فرحي بعد شهر
انا فرحي بعد شهر.. كنت بخلص ورق الفيزا عشان هنسافر في شهر العسل أنا وخطيبي، وحصلت هناك كارثة دمرت حياتنا 😲
كنت فاكرة استخراج “الفيش والتشبيه” هيبقى شيء روتيني وكدا، زي أي ورق بنخلصه.
وقفنا في القسم، واديت الموظف البطاقة عشان يسجل البيانات ونبصم.
جه دوري..
لقيت أمين الشرطة قاعد يبص لشاشة الكمبيوتر بطريقة غريبة، وبعدين بصلي وبص لبطاقتي.
» أنسة.. هو إنتي ليكي عناوين تانية غير اللي في البطاقة؟
: لا يا فندم، طول عمري في نفس العنوان.. هو فيه حاجة ولا إيه؟
» استني هنا دقيقة وماتتحركيش.
دخل الأوضة اللي جوا، وبعد ربع ساعة طلع ومعاه ظابط. الظابط بصلي بجمود وقال:
» مبروك يا عروسة، بس للأسف مش هينفع تسافري، إنتي مقبوض عليكي.
: نعم؟! مقبوض عليا إزاي؟ أنا معملتش حاجة!
» إنتي عليكي حكم غيابي ٣ سنين سجن في قضية نصب وتبديد شيكات، ومطلوبة للتنفيذ.
لقيت خطيبي وشه جاب ألوان واتكلم بانفعال شديد:
إنت بتتكلم بجد يا باشا؟ أكيد في غلطة، بطاقتها متبدلة ولا حاجة!
» يا أستاذ الرقم القومي والاسم قدامي على السيستم، الحكومة مابتكدبش.
بصيت لخطيبي برعب مستنية منه يطمني أو يتدخل، لقيت نظرة عينه اتغيرت تماماً، ولقيت كلامه نزل زي الصاعقة عليا!
”وعملالي فيها البت المتربية اللي مفيش منها اتنين، وانتي طلعتي نصابة ورد سجون!!
كنت هتجوز واحدة عشان تتسجن وتفضحني وتسوء سمعتي في شغلي وعيلتي؟ كنتي عايزة تدبسيني!
الحمدلله إننا لسة مكتبناش الكتاب.
وسابني في القسم لوحدي ومشي!!
وكل دا أنا مذهولة من الموقف، إزاي يسيبني في موقف زي ده حتى لو أنا متهمة؟ إزاي مصدقش إني بريئة؟
الظابط نفسه استغرب موقف خطيبي، وطلب مني أعمل اتصال بحد من أهلي.
كلمت بابا وجه جري، وبمساعدة محامي تبعنا قدرنا نثبت مبدئياً إن الموضوع “تشابه أسماء رباعي”، والظابط طلعني بضمان محل إقامتي لحد ما نجيب شهادة من الجدول تفيد إن القضية دي تخص واحدة تانية.
روحت البيت مع بابا وكأني مغيبة، وصلت البيت بأعجوبة.
نمت يوم كامل وكنت بتمنى إني أصحى من الكابوس دا.
أو لو كان حقيقة أموت، مش عايزة أعيش تاني خلاص.
صحيت على صوت زعيق في البيت.
خطيبي كان بيزعق لبابا وعايز ياخد الدهب!
أنا اتكلمت بحاول أفهم: فيه إيه؟!
وخطيبي رد: بلاش أقول فيه إيه ولا الحج عارف إن بنته عليها أحكام!!
والحج رد وقال بثبات: عارف إيه؟ إنت ليه كلامك مش مفهوم؟ دي إجراءات عادية وبتحصل تشابه أسماء، بدل ما تقف جنب خطيبتك وتجيب محامي، بتهرب وتسيبها في القسم؟ دا انتوا فرحكم كمان شهر!
خطيبي قال: ما هو مبقاش فيها فرح خلاص، بنتك نصابة وعليها أحكام، شوفوا مين اللي كانت بتنصب عليه وجوزهالوا!
بابا قاطعه بصوت هز البيت: اخرس إنت اتجننت!! أنا بنتي أشرف من الشرف، وافتكر إنك كنت هتموت بس عشان تخطبها.
عموماً بنتي حتى لو كان عليها مشكلة، أنا كنت محتاج راجل يقف في ضهرها، مش عيل يبيعها من أول مطب.
اسمع يا واد إنت، إنت تاخد دهبك وحاجتك على الجزمة مش عشان إنت عندك حق، بس عشان إحنا ما يشرفناش إنك تطول تبقى جوزها.
وقبل ما تتبلى أو تجيب سيرتنا بالوحش زي ما عملت.
واعمل حساب العِشرة والعيش والملح.
اعمل حساب الأصول.
الراجل بيبان في الشدة، وإنت طلعت أقل من إنك تتآمن على بيت وعرض!
رد وقال: عايز حاجتي.
وفعلاً أخد حاجته ومشي. لقيت أبويا بصلي وقالي:
إنتي متأكدة إنك عمرك ما مضيتي على أي وصل أمانة لأي شركة تقسيط ولا حاجة؟
: أيوه يا بابا والله العظيم أبداً!
طيب تمام، بكرة الصبح هنروح مصلحة الأمن العام والمحكمة نخلص الحوار ده من جذوره.
یتبع…
الکاتبه_نور_محمد
وتاني يوم فعلاً روحنا، ومش هتتخيلوا إيه اللي حصل… 😲 واكتشفنا إيه 😱 والمفاجأة اللي ظهرت بخصوص القضية دي ومين اللي كان وراها!!
القصة رائعة .. للمتابعة لايك واكتب تم وبس وهرد عليك فوراً بباقي القصة
تاني يوم صحيت بدري رغم إني ما نمتش غير شوية، قلبي كان مقبوض وخايفة من اللي جاي. لبست وخرجت مع بابا، وهو طول الطريق بيطمني: “متخافيش يا بنتي، الحق بيبان ولو بعد حين.”
وصلنا مصلحة الأمن العام، وبعدها على المحكمة عشان نطلع شهادة من الجدول. المحامي كان مستنينا هناك، وبدأ يراجع في الأوراق ويشوف رقم القضية بالتفصيل.
الموظف دخل بياناتي على السيستم… وبعدين قال: “القضية فعلاً فيها تشابه أسماء… بس الغريبة إن العنوان المسجل مختلف خالص.”
المحامي ركّز وسأله: “طيب اسم الأم إيه في القضية؟”
الموظف بص للشاشة وقال الاسم…
أول ما سمعته… حسيت الأرض بتتهز تحت رجلي!
الاسم ده… أنا عارفاه كويس!
بصيت لبابا بصدمة وقلت: “ده اسم… مرات عمي!!”
بابا اتفاجئ وقال: “إنتي متأكدة؟!”
هزيت راسي وأنا مش مستوعبة: “أيوه… نفس الاسم الرباعي!”
المحامي طلب نسخة من بيانات المتهمة الأصلية، ولما طلعت… كانت الصدمة أكبر!
الصورة… شبهـي جدًا! نفس الملامح تقريبًا، لدرجة إن أي حد ممكن يتلخبط بينا!
لكن الحقيقة اللي كسرتني بجد… إن العنوان اللي كانت مسجلاه المتهمة… كان بيت قديم بتاع عيلتنا… وكانت عايشة فيه مرات عمي فترة!
هنا بدأ الشك يتحول لحقيقة مرعبة…
المحامي قال: “كده الموضوع مش مجرد تشابه أسماء… في احتمال كبير يكون في تعمّد!”
بابا اتعصب وقال: “يعني إيه تعمّد؟!”
المحامي رد بهدوء: “يعني ممكن حد استخدم بيانات بنتك أو قريب منها عشان يهرب من القضية… أو يلخبط الدنيا.”
رجعنا البيت، وبابا قرر يكلم عمي فورًا.
عمي جه وهو متوتر، وأول ما بابا فتح الموضوع، لقيته بيتلخبط في الكلام بشكل غريب!
بابا قاله بحدة: “مراتك اسمها متسجل في قضية نصب… وعنوانكم القديم موجود في الأوراق… تفسر ده بإيه؟!”
عمي حاول يهرب من الإجابة: “يمكن صدفة… يمكن حد تاني…”
بس قبل ما يكمل… دخلت مرات عمي فجأة!
وشها كان شاحب… وعينيها فيها خوف واضح.
بصتلنا كلنا… وبعدين قالت بصوت مهزوز: “خلاص… أنا هقول الحقيقة.”
الدنيا سكتت تمامًا…
وقالت: “أيوه… أنا اللي عملت كده.”
حسيت قلبي وقف!
كملت وهي بتعيط: “أنا كان عليا ديون كبيرة… وكنت هموت وأدخل السجن… ملقتش حل غير إني أستخدم اسم قريب مني… وحد شبهه… عشان أهرب شوية وقت!”
بابا انفجر فيها: “تروحي تلبسي بنتي المصيبة؟! دي كانت هتتسجن بدلِك!”
بصتلي وهي بتترجاني: “والله ما كنت أقصد توصل لكده… كنت فاكرة الموضوع هيعدي!”
أنا وقتها ما قدرتش أتكلم… كنت حاسة إني اتكسرت من جوايا.
مش بس بسبب اللي حصل… لكن عشان اللي عمل كده… من دمي!
المحامي قال بحزم: “الكلام ده لازم يتثبت رسمي… ولازم تعترفي في المحضر، وإلا البنت دي هتفضل متورطة.”
وفعلاً… بعد تحقيقات وأيام صعبة… مرات عمي اعترفت رسمي، واتقبض عليها.
واتشال اسمي من القضية… واتثبتت براءتي.
بس الغريب…
إن الموضوع ما انتهـاش هنا!
بعد أسبوع… خطيبي رجع تاني!
واقف قدام باب البيت… ووشه كله ندم… وبيقول: “أنا غلطت… سامحيني… كنت خايف ومش مستوعب… بس دلوقتي عرفت إنك بريئة.”
بصيت له… وسكت شوية…
وافتكرت كل اللي حصل…
افتكرت إزاي سابني… واتهمني… وجرحني قدام الكل…
وقتها بس فهمت…
إن اللي باع مرة… هيبيع ألف!
رفعت راسي وبصيت له وقلت بهدوء: “اللي حصل كشف لي حقيقتك… وأنا مستحيل أكمل حياتي مع حد سابني في أول أزمة.”
وقف مصدوم… ومقدرش يرد.
وقفل الباب وراه… وأنا لأول مرة من أيام… حسيت إني قوية.
قوية لأني خسرت ناس ما تستاهلش… وكسبت نفسي ❤️
تمت.
